काठमाडौं । आईसीसी विश्व टेस्ट च्याम्पियनशिप २०२५ को ऐतिहासिक उपाधि दक्षिण अफ्रिकाले जितेको छ । बेलायतको प्रसिद्ध लर्ड्स क्रिकेट मैदानमा सम्पन्न फाइनल खेलमा दक्षिण अफ्रिकाले पूर्वविजेता अस्ट्रेलियालाई पाँच विकेटले पराजित गर्दै पहिलो पटक उपाधि उचालेको हो ।
अस्ट्रेलियाले दिएको २८२ रनको लक्ष्य दक्षिण अफ्रिकाले खेलको चौथो दिन पाँच विकेटको क्षतिमा भेट्टायो । दक्षिण अफ्रिकाको जितमा ओपनर एडेन माक्ररमले १३६ रनको शतकीय पारी खेले भने कप्तान टेम्बा बभुमाले ६६ रन बनाएर जितको आधार मजबुत पारे ।
बलिङतर्फ अस्ट्रेलियाका मिचेल स्टार्कले तीन विकेट लिए भने कप्तान प्याट कमिन्स र जोश हेजलवुडले समान एक–एक विकेट हात पारे । यसअघि, दक्षिण अफ्रिका ६९.४४ प्रतिशत अङ्कसहित र अस्ट्रेलिया ६७.५४ प्रतिशत अङ्कसहित विश्व टेस्ट च्याम्पियनशिपको शीर्ष दुईमा रहँदै फाइनल प्रवेश गरेका थिए ।
उपाधिसँगै दक्षिण अफ्रिकाले ३.६ मिलियन अमेरिकी डलर पुरस्कार प्राप्त गरेको छ भने उपविजेता अस्ट्रेलियाले २.१६ मिलियन अमेरिकी डलरमा चित्त बुझाएको छ । सन् २०१९ मा सुरू भएको विश्व टेस्ट च्याम्पियनशिपको पहिलो संस्करणमा न्युजिल्यान्डले भारतलाई पराजित गर्दै उपाधि जितेको थियो ।
दोस्रो संस्करणमा अस्ट्रेलियाले भारतलाई नै हराउँदै च्याम्पियन बनेको थियो । तर यस पटक दक्षिण अफ्रिकाले पहिलो पटक उपाधि जित्दै आफ्नो टेस्ट इतिहासमा ऐतिहासिक सफलता हासिल गरेको छ ।
